A directora de Turismo de Galicia destacou que os recursos vinculados á práctica do turismo náutico en Galicia son envexables
A directora de Turismo de Galicia, Nava Castro, participou en Ibernáutica, o ciclo cultural e empresarial co que culminou a Semana Abanca en A Coruña.
Na súa intervención “Futuro e desenvolvemento do turismo náutico en Galicia” Nava Castro expuxo os principais recursos vinculados á práctica do turismo náutico en Galicia, dos cales dixo “son envexables”.
A directora de Turismo de Galicia afirmou que desde a Administración turística galega estanse a realizar importantes esforzos para desenvolver e promover este produto. “O noso obxectivo é implementar sinerxías que nos permitan converter a práctica da náutica e os recursos a ela asociados nun factor de desenvolvemento das localidades nas que se asentan”, sinalou na súa intervención. “Así, poder configurar un produto global que dinamice a economía e cree complementariedades para avanzar na consolidación do destino Galicia”, engadiu.
O Plan Integral de Turismo de Galicia salienta, entre as fortalezas da comunidade, a biodiversidade e a riqueza das rías galegas, o liderado de Galicia a nivel nacional en praias e sendeiros con Bandeira Azul, a existencia de eventos deportivos con alto potencial para xerar fluxos turísticos e para articular novos produtos específicos e a oferta de cruceiros que permite a chegada de novos fluxos turísticos. Deste xeito, a segunda liña do devandito plan céntrase na oferta turística baseada no patrimonio e nos recursos endóxenos diferenciais, buscando a desestacionalización e os novos públicos.
Neste senso, Nava Castro explicou que un dos produtos turísticos especializados dirixidos a segmentos de público específico que está incluído no Plan e co que se está a traballar é o turismo náutico. Concretamente no documento inclúese como acción a impulsar, segundo explicou, a organización, mellora e promoción da oferta relacionada co turismo náutico e o seu acondicionamento para a recepción e atención de visitantes e comercialización de experiencias turísticas complementarias que favorezan o intercambio da estanza e o gasto medio diario dos viaxeiros.
A directora de Turismo de Galicia expuxo que para o cumprimento deste obxectivo recompiláronse accións concretas como a dotación de información turística nas estacións náuticas ou a disposición de accesos directos desde os clubs náuticos ás plataformas de venda en liña de experiencias turísticas próximas.
Nava Castro sinalou que dende Turismo de Galicia estase a fomentar tamén a certificación dos clubs náuticos en normas UNE específicas para as instalacións náutico-deportivas e a obtención do galardón internacional de Bandeiras Azuis. Sobre este asunto, a directora galega de Turismo afirmou que “dende a Administración turística galega apóstase fortemente por incrementar a calidade nos produtos e servizos prestados para lograr a diferenciación do destino Galicia”.
Mostra diso é que Galicia se converteu na Comunidade con máis distintivos Q de Calidade de toda España tras Andalucía. Entre estas empresas existen nove instalacións náuticas que sitúan Galicia como a comunidade líder en empresas desta tipoloxía con Q de Calidade Turística, ao situarse nela o 56,3% de todas as instalacións certificadas de España. A estas certificacións hai que sumar os coñecidos distintivos de calidade ambiental Bandeiras Azuis. En Galicia existen 19 portos nos que ondea esta bandeira e segue sendo a comunidade española con maior número de bandeiras azuis nas praias e sendeiros, concretamente hai 123 areais e 15 sendeiros con esta distinción.
Convenio coa Asociación Española de Estacións Náuticas
Outras accións relacionadas con turismo náutico nas que estase a traballar dende Turismo de Galicia é o desenvolvemento e promoción turística do produto estacións náuticas a través dun convenio de colaboración coa Asociación Española de Estacións Náuticas. Grazas a este convenio desenvólvese un programa de accións encamiñadas á canle, con vistas á comercialización indirecta e outras dirixidas ao consumidor, co obxectivo de xerar tráfico e vendas directas a través do portal da asociación.
Dentro das accións destinadas á canle de comercialización pódese destacar a asistencia a feiras especializadas en turismo en España, Francia e Alemaña. Neste senso, Nava Castro anunciou a celebración, a finais deste mes en Sanxenxo, dunhas xornadas de aceleración comercial co obxectivo de conseguir unha maior sincronización entre todos os axentes que participan na promoción do Club de Produto Estacións Náuticas. “O propósito destas xornadas é acelerar a rendibilidade das accións orientadas á comercialización, creando indicadores de control que permitan executar as prioridades”, explicou.
Para concluír, a directora de Turismo de Galicia afirmou que “Ibernáutica foi o mellor escenario para que especialistas e representantes de clubs náuticos de diferentes partes do noso país puidesen achegar as súas exposicións e con elas obtivemos uns resultados que servirán para fortalecer o turismo náutico galego”.
